Siku ya Wanawake Duniani Ngazi ya Mkoa Kufanyika Machi 8,2024-Kigamboni

Posted on: March 5th, 2024

Mkuu wa Mkoa wa Dar es Salaam Mhe Albert Chalamila leo Machi 5, 2024 akiongea na waandishi wa Habari Ofisi kwake Ilala Boma ametoa taarifa kwa umma juu ya maadhimisho ya Siku ya Wanawake Duniani ngazi ya Mkoa ambayo yatafanyika katika Uwanja wa Mji Mwema-Kigamboni tarehe 8/03/2024

RC Chalamila amesema maadhimisho hayo yenye kauli mbiu "Wekeza kwa Wanawake Kuharakisha Maendeleo ya Taifa na Ustawi wa Jamii" yamelenga kuelimisha, kuhimiza na kuhamasisha Umma kuhusu umuhimu wa kuwezesha Wanawake kushiriki katika ngazi za kufanya maamuzi, uongozi na usawa wa kijinsia ili kufikia maendeleo endelevu.

Aidha RC Chalamila amesema Siku hiyo ya Wanawake itaambatana na Uzinduzi wa Jukwaa la Uwezeshaji Wanawake Kiuchumi Mkoa wa Dar es Salaam vile vile kuanzia machi 6, 2024 kutakuwa na maonyesho ya bidhaa mbalimbali za wajasiliamali wa kitanzania hususani wa Mkoa huu.

Hivyo RC Chalamila amewataka wanawake na wasio wanawake, pia makundi mengine Machi 8, 2024 kuanzia saa 2:00 asubuhi kujitokeza kwa wingi kuungana na wanawake kote Nchini na Duniani kuadhimisha siku hiyo muhimu