RC Makalla Ataka Machinga Kariakoo Kuchangamkia Nafasi 2400 Machinga Complex-Ilala

Posted on: October 29th, 2021

- Asema Machinga Complex-Ilala bado kuna nafasi 2400 ziko wazi

- Amuagiza Mkurugenzi Ilala kumaliza Changamoto ya Umeme, Maji na Vyoo

- Aahidi kutoa maelekezo LATRA ili kuwa na "route" ya daladala Machinga Complex

- Ampongeza Rais Samia Suluhu kwa kutoa pesa kuboresha maeneo ya Wamachinga

Mkuu wa Mkoa wa Dar es Salaam Mhe Amos Makalla leo Oktoba 29, 2021 ametembelea soko la Machinga Complex- Ilala, Dar es Salaam.

Akiwa katika Soko hilo alipata wasaa wa kuzungukia eneo la soko kujionea Utekelezaji wa agizo lake la Kuwapanga vizuri wamachinga ambapo alijionea Wamachinga waliohamia tayari na bado nafasi zingine zipo wazi.

Mhe Makalla amesema Muongo muongoze watu wanasema hakuna nafasi lakini amejionea kwa macho yake nafasi zilizowazi takribani 2400 ndipo akatoa Rai wamachinga wa Kariakoo kuhamia Machinga Complex nafasi zipo.

Aidha Mkuu wa Mkoa amemuagiza Mkurugenzi wa Jiji la Dar es Salaam kushughulikia Changamoto zilizoko Machinga Complex ikiwemo kuleta umeme haraka, Maji na Kuongeza vyoo kwa kuwa vilivyoko kwa sasa ni vichache havitakidhi mahitaji kwa kuwa wafanyabiashara wadogo wanaongezeka.

Sambamba na hilo Mhe Makalla ameahidi kufanya mazungumzo na  LATRA kwa lengo la kuelekeza Daladala kufika Machinga Complex, hiyo itasaidia wateja wanaokuja kununua bidhaa wasipate adha ya usafi.

Mhe Makalla akikagua Banda kililojengwa Pembeni mwa Jengo la Machinga Complex kwa ajili ya Wamachinga amempongeza Rais wa Jamhuri ya Muungano wa Tanzania Mhe Samia Suluhu Hassan kwa kutoa Milioni 100 ambazo zimewezesha kujengwa kwa kibanda ambacho kimekamilika na kinatumiwa sasa na wamachinga.

Mhe Makalla amesema ataendelea kutembelea maeneo mbalimbali ambayo wamachinga wamehamia ili kutatua Changamoto ndogo ndogo leo ameaanza na Machinga Complex

Serikali ya Mkoa wa Dar es Salaam inafanya kila jitihada kuhakikisha inatatua Changamoto ndogo ndogo zote zilizoko katika maeneo yote yaliyotengwa kwa ajili ya Wamachinga ili kuyaboresha