RC Chalamila Halmashauri Zichukue Hatua Stahiki kwa wale Wanaohusika na Upotevu wa Fedha za Umma

Posted on: June 22nd, 2023

- Apongeza Manispaa ya Temeke na Kigamboni kwa kupata hati safi mwaka wa fedha 2021/2022

-Awataka kusimamia vizuri ukusanyaji wa mapato na kudhibiti matumizi

Mkuu wa Mkoa wa Dar es Salaam Mhe Albert Chalamila leo Juni 22,2023 amehitimisha ziara yake ya kushiriki *vikao vya kikanuni vya mabaraza ya kupitia hoja za CAG katika Halmashauri ya Manispaa ya Temeke na Kigamboni Jijini Dar es Salaam.

RC Chalamila amezitaka Halmashauri hizo kupitia Wakurugenzi wake kuwachukulia hatua za kinidhamu watumishi wanaohusika na upotevu wa fedha za umma.

Ameyasema hayo kwa nyakati tofauti wakati wa vikao hivyo katika *Manispaa ya Temeke na kuhitimisha Halmashauri ya Manispaa ya Kigamboni

RC Chalamila amepongeza Manispaa hizo kwa kupata hati safi kufuatia ripoti ya mdhibiti na mkaguzi wa Hesabu za Serikali CAG ya mwaka wa fedha 2021/2022 vilevile Ofisi ya CAG kupitia Ukaguzi wa Hesabu uliofanywa uliopekelea kubaini kasoro mbalimbali ambazo zinafanyiwa kazi na Halmashauri kwa masilahi mapana ya Umma

Aidha Mhe Chalamila amesema lazima Halmashauri zisimamie vizuri ukusanyaji wa mapato na kudhibiti matumizi ya fedha katika maeneo yao, pia kufanya kaguzi za mara kwa mara, kuongeza juhudi katika kuzuia hoja za CAG, usimamizi mzuri wa miradi ya maendeleo, manunuzi ya Umma, kuhakikisha Mikopo iliyotolewa ya asilimia 10 inarejeshwa, kuboresha masoko ili kuongeza mapato na kuitumia vizuri Ofisi ya mkaguzi wa ndani

Hata hivyo RC Chalamila amewataka madiwani kuwaelimisha wananchi kuhusiana na mkataba wa uendelezaji na Ubia wa Bandari ya Dar es Salaam kwa kuonyesha tija ya mkataba huo kwa umma na dhamira ya Mhe Rais Dkt Samia Suluhu Hassan ili kuepuka upotoshwaji unaofanywa na watu wasioitakia mema nchi ya Tanzania

Sambamba na hilo Mhe Chalamila amesema anatarajia kufanya ziara katika Wilaya zote za mkoa huo kwa lengo la kutembelea miradi ya maendeleo inayotekelezwa na kusikiliza kero za wananchi