RC Chalamila Azindua Teknolojia ya LED Screens Uwanja wa Azam FC

Posted on: August 16th, 2023

Akizindua Teknolojia hiyo ya LED screens katika uwanja wa Azam Football Club leo Agosti 16, 2023 Mkuu wa Mkoa wa Dar es Salaam Mhe Albert Chalamila ameipongeza club hiyo kwa Teknolojia ya kisasa ambayo inaleta mapinduzi makubwa katika sekta ya mpira na biashara hapa nchini na kuzifanya sekta hizi mbili kuwa kitu kimoja.

RC Chalamila amesema kampuni ya NATKERN ambayo ni kampuni ya kizawa inayojikita katika Teknolojia ya LED screens pamoja na Azam Football Club imetoa wigo mpana wa ushirikiano wa kibiashara na kuchangia katika kuingiza kipato kwa kampuni hizi mbili pamoja na kuongeza ajira nchini.

Aidha RC Chalamila amesema Serikali ya awamu ya sita chini ya Rais Mh.Dkt Samia Suluhu Hassan itaendelea kuboresha na kutengeneza Mazingira mazuri yatakayo vutia uwekezaji wa aina mbalimbali ili kuendelea kukuza pato la Taifa

Hata hivyo RC Chalamila ametoa rai kwa club zingine kongwe za mpira hapa nchini kuja kujifunza uwekezaji wa Kidigitali uliofanywa Azam Football Club ambapo screen za kisasa zimewekwa kuzunguka uwanja huo ambazo zinawezesha matangazo ya biashara kuonyeshwa wakati mpira unachezwa kwa aliye ndani ya uwanja na majumbani hivyo watazamaji wengi wataweza kufuatilia matangazo na mchezo wa mpira kwa wakati mmoja.

Kwa upande wa Mkurugenzi Mtendaji wa Azam FC Ndg Abdukarim Nurdin amemshukuru Mkuu wa Mkoa kwa kutenga muda wake kuungana na club hiyo katika Uzinduzi wa Teknolojia hiyo ya Kidigitali, hivyo ni wakati muafaka sasa kwa wafanyabishara, Taasisi na Sekta za Umma kutumia fursa hiyo kutangaza biashara na huduma zinazotolewa kwa kuwa Teknolojia hiyo ina uwezo wa kufikisha ujumbe katika idadi kubwa ya watu kwa wakati mmoja.