RC Chalamila Afungua Mkutano Mkuu wa Mwaka wa DCPC

Posted on: October 27th, 2023

Akifungua Mkutano huo wa mwaka wa Club ya Waandishi wa Habari Jiji la Dar es Salaam (DCPC) katika Ukumbi wa Mikutano Arnatoglo Mnazimmoja Mkuu wa Mkoa wa Dar es Salaam Mhe Albert Chalamila amewataka wadau katika sekta ya Habari kwenda na kasi ya Teknolojia ambayo imekuwa ikibadilika kila kukicha.

RC Chalamila amewataka wanahabari kuzingatia taaluma, Sheria, kanuni na maadili ya uandishi wa Habari kwa kuhakikisha Habari wanazozitoa zinakidhi vigezo vya kihabari zihaririwe kabla ya kurushwa " Habari nyingi siku hizi zinatolewa pasipo kuchakatwa au kuhaririwa ambapo hupelekea upotoshwaji ni vizuri kusimamia misingi ya taaluma" Alisema RC Chalamila

Aidha Mhe Mkuu wa Mkoa alisema Rais Dkt Samia anajali na kuthamini sekta ya Habari toka aingie madarakani amefanya maboresho makubwa ya kisera na pia mapitio ya sheria hivyo rai yake kwa wanahabari kumuunga mkono Mhe Rais na kuwa wazalendo wakati wote wa kutekeleza majukumu yao ya kihabari.

Vilevile Club hiyo ya Waandishi wa Habari imemkabidhi Mkuu wa Mkoa zawadi ya Mhe Rais wa Jamhuri ya Muungano wa Tanzania ya kumshukuru na kutambua juhudi na dhamira yake njema katika kuboresha sekta ya Habari hapa nchini.

Sambamba na hilo DCPC imemuomba Mkuu wa Mkoa kuwa mlezi wa club hiyo ambapo amekubali pia wamemuomba Ardhi kwa ajili ya ujenzi wa Ofisi pamoja samani za Ofisi ili kuweze kutekeleza majukumu yao kwa ufasaha

Mwisho DCPC inazidi ya wanachama hai 150 na Mkutano Mkuu wa mwaka unalenga kutathimini Utendaji wa kazi, hali ya Uchumi na Mazingira ya kazi za kihabari za kila siku kwa mwaka mzima