Rais Dkt Samia Atoa Mkono wa Pole kwa Familia iliyopoteza Watoto Wanne kwa Ajali

Posted on: August 9th, 2023

Mkuu wa Mkoa wa Dar es Salaam Mhe Albert Chalamila leo Agosti 09,2023 amewasilisha salamu za Mhe Rais wa Jamhuri ya Muungano wa Tanzania Dkt Samia Suluhu Hassan na mkono wa pole kwa familia ya Mzee Hashim Msuya iliyofikwa na msiba wa kupoteza watoto wanne (4) kufuatia ajali iliyotokea eneo la Mbwewe Pwani Agosti 3, 2023.

RC Chalamila amefika nyumbani kwa familia Mbezi Beach Kinondoni Dar es Salaam na kukabidhi kwa familia Rambirambi iliyotolewa na Mhe Rais Dkt Samia ikiwemo fedha taslimu *shilingi millioni 10, sukari, mchele, ngano, mafuta ya kupikia, chumvi, maziwa na vinywaji mbalimbali kama maji, soda na yogati, vilevile vitambaa na vitenge kwa ajili ya kuwafariji wafiwa hao.

Aidha Mhe Chalamila amesema msisitizo wa Mhe Rais ni kuwa Wazazi hao ambao ni wazee waliofikwa na msiba huo mkubwa kupatiwa matibabu bila malipo katika Hospital ya Taifa Muhimbili, Taasisi ya Moyo ya Jakaya Kikwete na hata Hospitali ya Benjamin Mkapa Dodoma wakati wote watakapo hitaji huduma za afya.

Sambamba na hilo RC Chalamila amesema Mhe Rais Dkt Samia ameiomba familia hiyo kuendelea kuwasimamia watoto waliopoteza wazazi wao ili wafikie ndoto zao.

Kwa Upande wa Mzee Hashim Msuya akitoa neno la shukrani kwa Mhe Rais amemshukuru sana kwa upendo wake wa kuwafariji katika Kipindi hiki kigumu kwao zaidi na zaidi anamuombea kwa mwenyezi Mungu Rais Dkt Samia Suluhu* maisha marefu na aendelee kuliongoza Taifa hili " Mimi Msuya ni nani hadi Mkuu wa nchi aje kunifariji, mwenyezi Mungu ambariki sana Rais Dkt Samia" Alisema Mzee Msuya