"DAR ES SALAAM NI KITOVU CHA KIBIASHARA NA UWEKEZAJI" RC MAKALLA

Posted on: August 4th, 2021

 Mkuu wa Mkoa Mhe Amos Makalla akifungua baraza la biashara la Mkoa wa Dar es Salaam mapema leo katika ukumbi wa  Hotel ya Golden Tulip Jijijini Dar es Salaam.

#  Aahidi kutekeleza mambo makuu manne (4) kwa mstakabali wa wafanya biashara wa Mkoa wa Dar es Salaam na Uchumi wa Taifa la Tanzania

Mkuu wa Mkoa wa Dar es Salaam Mhe Amos Makalla ameyasema hayo leo wakati anafungua kikao cha baraza la biashara  la Mkoa wa Dar es Salaam.

Kikao cha baraza hilo la biashara la Mkoa  kimefanyika katika ukumbi wa *Hotel ya Golden Tulip* Posta mpya Jijini Dar es Salaam.

Mheshimiwa Mkuu wa Mkoa amesema Dar es Salaam ni kitovu cha kibiashara  na uwekezaji na hiyo hupelekea kuwa ni Mkoa unaochangia asilimia kubwa ya pato la Taifa.

Kwa mantiki hiyo Mkoa una kila sababu ya kuweka mazingira mazuri na wezeshi kwa wafanyabishara na wawekezaji.

"Niwahakikishie wafanyabishara wote wakubwa na wadogo Mkoa umejiimarisha katika Ulinzi na Usalama, kukusanya kodi kwa mujibu wa sheria, kuondoa urasimu na rushwa, kujenga mahusiano mazuri na sekta binafsi wakati wote " Alisema RC MAKALLA

Aidha Mkuu wa Mkoa amefafanua katika kuondoa urasimu na rushwa mkoa umeanzisha "One Stop Centre" ambayo ndani yake kutakuwa na taasisi anuai kama vile TRA, BRELLA OSHA, TBS, TMDA nk, na hilo linaanza rasmi 1/09/ 2021 na itakuwa chini ya ofisi ya Mkuu Mkoa na badae itashuka chini katika ngazi za Wilaya.

Vilevile amesema Dar es Salaam lazima iwe safi na mpangilio mzuri wa wafanyabiashara wadogo mpango wa utekelezaji wa jambo hilo unakuja hivi karibuni.

Aidha kwa kuwa Taifa linapitia wimbi la tatu la ugonjwa wa UVIKO-19  Mganga Mkuu wa Mkoa Dkt Rashid Mfaume  ameendelea kutoa rai kwa jamii kuendelea kuchukua hatua za kukabiliana na ugonjwa huo kupitia mwongozo wa Wizara ya Afya na amehimiza umuhimu wa chanjo na vituo vya kuotoa chanjo vipo katika Mkoa Jamii itumie vizuri fursa hiyo.